محمود
كان غلط من الاول …….. ارتباطنا كان غلط من اوله …….. مكنش لازم افكر بالطريقه دى
مينفعش لما يكون الواحد بيحب ويسيب حبيبه يرتبط بسرعه لمجرد انه ينسى حبه دا …….. انا كان نفسى ابدء تانى كنت اتعودت على احساس الارتباط بس انا كنت لسه بحب غاده ومكنتش نسيتها …….. دى غلطتى

شيماء
لا غلطتى …….. لما قالى انها غلطته كان لازم اقول انها غلطتى…… انا كنت عارفه انه لسه بيحب غاده وكنت متاكده انه ملحقش ينساها ومع ذلك وافقت ارتبط بيه ……… تبقى غلطتى
بس انا ومحمود اصحاب من واحنا اطفال ……. دايما سوا ومع بعض اتربينا سوا لاننا جيران واهلنا كمان اصحاب…….. مش فاكره بدئت احبه من امتى بس انا فاكره انى من اول ما فهمت مشاعر الحب من واحنا فى سن المراهقه وانا بحب محمود وفضلت متمسكه بمشاعرى دى ومحاولتش احب حد تانى……..ومعرفش ليه هو حب غيرى ………. ليه دايما كان شايفنى اخته الضغيره وبس …… معرفش

محمود
كنت حاسس انها اختى واكتر واحده فاهمانى ……….. وكنت بحكيلها كل حاجه عن غاده وكانت بتختار معايا الهدايا وبتقولى اتصرف ازاى لما اتخانق انا وغاده ودايما كانت بتنصحنى صح
ولما سبت غاده شيماء وقفت جنبى جدا وساعدتنى……. ساعتها حسيت انى بحبها او محتاج انها تكون جنبى علطول فكلمتها…….

شيماء
كنت عارفه انه لسه مصدوم ومكنش المفروض اوافق بس انا فرحت اوى دا كان حلم …….. واحد بحبه كان شايفنى اخته ودايما بياخد رايى فى مواقفه مع حبيبته ويسالنى ويحكيلى وانا رغم اللى كنت بحسه وقتها كنت دايما بساعده وبدعيله ربنا يسعده انما لما سابها وكلمنى مقدرتش اسمع كلام عقلى وقبلت وانا هطير من الفرح

محمود
وانا كمان فرحت لما وافقت ……… وكنت سعيد جدا فى اول العلاقه ……. كانت واقفه جنبى ومستحملانى ودايما بتسال عليا وبتسمع كل كلامى حتى لو كان حكايات عن غاده وعمرها ما رديتلى كلمه اللى كنت بقوله كان بيمشى حتى لو ضد رغبتها ….. وبصراحه دا كان عاجبنى …….. لحد لما عدت صدمه غاده ووقفت على رجلى تانى

شيماء
كنت مبسوطه وعاوزه انفذله كل رغباته ……… واحسسه انى بسمع كلامه ……… وابعد عن كل اللى كان بيضايقه من غاده حتى لو ضد رغبتى
بس للاسف لما يكون فى حب مش متكافئ لازم بيفشل فى النهايه …..لما بدء يبقى كويس ويعدى صدمه غاده احساسه بدء يتغير

محمود
حاولت اتاقلم مع شيماء كتير بس انا كنت طول الوقت فاكر غاده وبتكلم عنها وبحكى مواقفها ………. حتى لما فقت خلاص من صدمتها كان لسه ليها مكانه فى قلبى انسانه ارتبط بيها اربع سنين هنساها ازاى فى شهر……
شيماء انسانه هايله بجد ……… بس انا اكتشفت انى محتاج لوجودها جنبى ………. كصديقه وبس

شيماء
كل ما كان بيحكى عن غاده كنت بحس بغيره اوى وكنت بحس انه محبنيش ومش عارف يحبنى
كنت عارفه انه مش بيحبنى وانى اخت وبس ومش هينفع اكون حبيبه ………. بس دا فى الاول بس بعد كده انا كمان بدئت احس ان مش دا محمود اللى انا حبيته دا عصبى وغيور ومش بيتناقش حتى…….. لما كنا اصحاب كان غير كده كان بيتناقش وبيتكلم وعنده استعداد للاقناع بالراى التانى ……. كان ديمقراطى جدا ودمه خفيف ومش بيبطل هزار ايه اللى قلبه كده
انا كمان حاسه ان حبى لمحمود كان مشاعر اطفال وانا اللى اتمسكت بيها ودا كان غلطتى

محمود
المشكله بدئت لما ماما قالتلى هنروح نخطبهالك امتى…….. فى الوقت اللى اتاكدت فيه ان مشاعرى مش حقيقيه بدئوا هما يسالوا عن الخطوبه ………… مبقتش عارف اعمل ايه ولا اتصرف ازاى

شيماء
انا رسمت صوره فى خيالى وطبقتها على محمود بس هى مش صورته …………… انا رسمت محمود جوايا بصفات تانيه حبيتها انما دى بجد مش حقيقته …….. بمعنى تانى انا رسمت فارس احلامى بصوره محمود وصفات تانيه مش فى محمود
المشكله ان مامته لمحت لماما ان هما هييجوا قريب ………. مبقتش عارفه عامل انا ايه انا واثقه انه لسه منساش غاده وانه لسه مش مستعد يبدء دلوقتى……… وانا كمان اكتشفت انى كنت بحب شخص تانى مش محمود ……… شخص رسمته فى خيالى وسميته محمود

محمود
لو اتكلمت دلوقتى هتحصل مشكله ولو اتخطبنا وسبنا بعض برضه مشكله…….. وعلشان كده انا اتكلمت دلوقتى وحصلت المشكله……… البيت كله ضدى ……… كلهم بيقولوا ان احنا جيران وعشرة عمر بحاله وان انا كده هخسرهم بعض اكيد
انا اعمل ايه انا حاسس انى اتسرعت لما كلمت شيماء ………. انا اه بحبها بس كصديقه شيماء حد جميل بس انا مش بحبها بالشكل اللى يخلينا نرتبط ……… انا كنت تحت تاثير الصدمه الاولى ولما فقت خلاص لقيتى انه مينفعش انى اعمل بدل واحده بواحده ……….. بس كنت خايف اصدم شيماء بالكلام دا

شيماء
ماما عملت اشكال كبير اوى لما قلتلها ان محمود مش زى ما انا كنت متصوره ………. طبعه صعب ولما قربت منه حسيت انى كنت غلطانه لما سبت مشاعر الطفوله تستمر معايا كل دا ……….. قالتلى هتخسرينا ناس اكتر من اهل ………… طول عمرنا جيران ومع بعض وانتى هتتسببى فى مشكله
انا اه بحب محمود وبحترمه بس لما قربت حسيت انى مش بحبه زى ما كنت متصوره انا بحبه كصديق وبس انما مش دا اللى حبيته واتمنيته زوج …….. مش هو
اقولًه ازاى ……….. انا كنت خايفه يشيل منى ومكنتش عاوزه اضايقه لو انا انسحبت من حياته وكنت خايفه لو عملت كده يرجع تانى زى ما كان بعد غاده ……………. كنت خايفه عليك يا محمود

محمود
فى الاخر قررت افتح الكلام مع شيماء ودا اللى كان لازم يحصل من الاول وفعلا كلمتها………… سالتها بصراحه انتى ايه شعورك ناحيتى…………

شيماء
كنت عاوزه اجامله لما سالنى عن احساسى لكن خفت ان الموضوع يكبر ومن الاول كان لازم اوجهه ولقيتنى بقوله ……. انا مش حاسه اننا ننفع اكتر من اخوات وبس يا محمود ………… انا اسفه
بس هو مزعلش بالعكس انا لقيته ابتسم وقالى ……….

محمود
الحمد لله انا كنت خايف اوى بس واضح اننا شبه بعض وفاهمين بعض لدرجه ان احساسنا واحد ………… انا كمان حاسس انى بدئت معاكى فى وقت غلط واننا اخوات وبس …………… متزعليش منى ………دا كان ردى لما قالتلى انها حاسه اننا اخوات وبس الحمد لله…….. ريحت ضميرى جدا

شيماء
انا اد ايه ارتحت ساعتها …………… بس لما حكيتلهم فى البيت الدنيا قامت ومقعدتش …………. قالوا اننا طول عمرنا اخوات ومكنش يصح يلعب بيكى ……… وشكلك قدام الجيران والناس والعادات ……….
والعيلتين اللى طول عمرهم اصحاب فجاه مبقوش يبصوا فى وش بعض ……. عندى لانهم اتضايقوا ان محمود لعب بيا علشان ينسى واحده تانيه مع انى شايفه انى انا كنت عارفه وانا اللى وافقت من الاول
اما بقى عند محمود …..

محمود
علشان عيلتى مكسوفين مش قادرين يتعاملوا مع اهل شيماء بطلوا يتعاملوا خالص واهلها كمان زعلوا وقالوا ان انا لعبت ببنتهم وخليت شكلهم وحش قدام الناس انا عارف انى كنت غلطان………. بس والله ما كنت اقصد………… مكنتش حابب توصل لكده ابدا ……….. مكنتش حابب اخسر وجودها جنبى كاخت وصديقه
بس عموما الحمد لله انها جت على قد كده قبل خطوبه او جواز وبرضه مكناش هنكمل لان طباعنا كانت مختلفه ……..

شيماء
عموما الحمد لله على كل حال……… مكنوش هيفرحوا بيا لو اتجوزت ورجعت احنا كده او كده طباعنا مختلفه جدا جدا ………… مكنش نافع ابدا اننا نكمل مع بعض
الحمد لله انها خلصت كده

Tags: break-up-stories